జిల్లా కలెక్టర్ కు మెమోరాండం ఇచ్చిన ఎంసిపిఐ(యు)
నర్సంపేట డిసెంబర్ 2 ( నమస్తే భారత్ ) :
పీడిత ప్రజల హక్కులకై భూమి బుక్తి విముక్తి కోసం జీవితాంతం పోరాడిన వీర తెలంగాణ రైతాంగ సాయుధ పోరాట యోధుడు అమరజీవి మద్ది కాయల ఓంకార్ ఆదర్శలను త్యాగాలను రాజకీయ విలువలను భవిష్యత్తు తరాలకు అందించే విధంగా పాఠ్యాంశంలో చేర్చి నర్సంపేట మెడికల్ కాలేజీకి ఆయన పేరుతో నామకరణం చేసి ఐదు ఎకరాల ప్రభుత్వ భూమి కేటాయించి స్మృతి వనం ఏర్పాటు చేయాలని ఎంసిపిఐ(యు) జిల్లా కార్యదర్శి పెద్దారపు రమేష్ డిమాండ్ చేశారు. ఎంసిపిఐ(యు) వరంగల్ జిల్లా కమిటీ ఆధ్వర్యంలో జిల్లా కలెక్టర్ కార్యాలయంలో డిఆర్ఓ విజయలక్ష్మి ని కలిసి వినతి పత్రం సమర్పించారు. ఈ సందర్భంగా పెద్దారపు రమేష్ మాట్లాడుతూ ప్రస్తుత రాజకీయాలు విలువలు కోల్పోయి వ్యాపారమయంగా మారిన తరుణంలో త్యాగాలతో ఆదర్శలతో రాజకీయ విలువలతో జీవితాంతం ప్రజల కోసం పనిచేసిన యోధుల చరిత్రను ఎప్పటికప్పుడు నెమరు వేసుకుంటూ కళ్ళ ముందు కనపడే విధంగా వారి స్మృతులను ఏర్పాటు చేయాలన్నారు. కష్టజీవుల సమస్యల పరిష్కారమే తన ధ్యేయంగా ఆనాటి నైజాం సర్కార్కు వ్యతిరేకంగా సాయుధ పోరాటంలో కీలక పాత్ర పోషించి తెలంగాణ విముక్తి కోసం పనిచేసిన అగ్ర గన్యుడు అమరజీవి కామ్రేడ్ మద్ది కాయల ఓంకార్ అని కొనియాడారు. తన నిజ జీవితంలో ఏనాడు స్వప్రయోజనాల కోసం పనిచేయకుండా ఐదుసార్లు నర్సంపేట ఎమ్మెల్యేగా ఎన్నికైన సొంత ఆస్తి లేకుండా ఉమ్మడి రాష్ట్ర ప్రజల గొంతుకగా అసెంబ్లీలో మాట్లాడుతూ ప్రజల చేత అసెంబ్లీ టైగర్ గా పిలిపించుకున్న గొప్ప మహానేత అని అన్నారు. అలాంటి వీరుడి చరిత్రను నాడు నేడు భవిష్యత్తులో కూడా ఆచరించాల్సిన అవసరం ఎంతైనా ఉందని రాజకీయాల్లో నిస్వార్థం సేవా భావం పెంపొందించుకోవాల్సిన అవసరం ఏర్పడిందని ఆ దిశలో ఓంకార్ చరిత్రను ముందు తరాలకు అందించే విధంగా పాఠ్యాంశంలో చేర్చాలన్నారు. నర్సంపేట నియోజకవర్గ అభివృద్ధికి ఓంకార్ సేవలను గుర్తిస్తూ నర్సంపేట మెడికల్ కాలేజీకి, అదేవిధంగా స్టేడియంకు నామకరణం చేయాలని నర్సంపేట వరంగల్ రోడ్డుకు ఓంకార్ మార్గ్ గా ప్రకటించాలని డిమాండ్ చేశారు. ఈ కార్యక్రమంలో పార్టీ జిల్లా సహాయ కార్యదర్శి నర్ర ప్రతాప్ నగర కార్యదర్శి మాలోత్ సాగర్ జిల్లా కార్యదర్శివర్గ సభ్యులు చుంచు జగదీశ్వర్ జిల్లా నాయకులు ఐతమ్ నాగేష్ తదితరులు పాల్గొన్నారు.
