మూసీ పరిరక్షణలో వివక్ష: అక్బరుద్దీన్ కళాశాలకు ఒక న్యాయం, పేదల ఇళ్లకు ఒక న్యాయమా? - బండి సంజయ్ కుమార్ 

 నమస్తే భారత్ శంషాబాద్  నార్సింగ్ జులై 10): మూసీ నది పరివాహక ప్రాంతంలో అక్రమ నిర్మాణాల తొలగింపు విషయంలో కాంగ్రెస్ ప్రభుత్వం, హైడ్రా అధికారులు అనుసరిస్తున్న ద్వంద్వ వైఖరిపై కేంద్ర హోం శాఖ సహాయ మంత్రి శ్రీ బండి సంజయ్ కుమార్ తీవ్ర ఆగ్రహం వ్యక్తం చేశారు. వేలాది మంది పేదల ఇళ్లను నిర్దాక్షిణ్యంగా కూల్చివేస్తున్న హైడ్రా, అక్బరుద్దీన్ ఒవైసీ అక్రమంగా నిర్మించిన కళాశాల జోలికి వెళ్లకపోవడాన్ని ఆయన తీవ్రంగా తప్పుబట్టారు.
 హైడ్రా అధికారి నిర్ణయంపై ప్రశ్నలు "అక్బరుద్దీన్ అక్రమంగా నిర్మించిన కళాశాల జోలికి వెళ్ళమని, వెళితే అన్యాయం జరుగుతుందని హైడ్రా అధికారి చెప్పడం దారుణం. మరి మూసీ పరివాహక ప్రాంతంలో కొన్ని వేల మంది పేద ప్రజల ఇండ్లను పడగొట్టినప్పుడు వారి నిస్సహాయ స్థితి చూసి, వారి గుండెకోత చూసి ఈ అధికారికి జాలి కలగలేదా?" అని శ్రీ బండి సంజయ్ కుమార్ ప్రశ్నించారు. ఒక పార్టీకి హైడ్రా అధికారి వత్తాసు పలకడం కన్నా మూర్ఖత్వం మరొకటి ఉండదని ఆయన ధ్వజమెత్తారు. ప్రభుత్వం స్పష్టం చేయాలి: ఇది హైడ్రా నిర్ణయమా? ప్రభుత్వం నిర్ణయమా?
అక్బరుద్దీన్ కళాశాల విషయంలో హైడ్రా అధికారి తీసుకున్న నిర్ణయం ఆయన వ్యక్తిగతమా లేక కాంగ్రెస్ ప్రభుత్వం ఆదేశాల మేరకు జరిగిందా అనే అంశంపై స్పష్టత ఇవ్వాలని శ్రీ బండి సంజయ్ కుమార్ డిమాండ్ చేశారు. ముఖ్యమంత్రి రేవంత్ రెడ్డి ఈ విషయంలో ప్రజలకు సమాధానం చెప్పాలని ఆయన అన్నారు. "ఇది హైడ్రా అధికారి నిర్ణయమా? ప్రభుత్వం యొక్క నిర్ణయమా? కాంగ్రెస్ ప్రభుత్వ నాయకులు.. సీ.ఎం. రేవంత్ రెడ్డి స్పష్టం చేయాలి!" అని ఆయన నిలదీశారు.
పేదలకు ఒక న్యాయం, పారిశ్రామికవేత్తలకు ఒక న్యాయమా?
పేద ప్రజల ఇళ్లను కూల్చివేసేటప్పుడు లేని నిబంధనలు, దయ అక్రమంగా నిర్మించిన కళాశాలకు ఎందుకు వర్తిస్తున్నాయని బండి సంజయ్ కుమార్ ప్రశ్నించారు. చట్టం అందరికీ సమానంగా వర్తించాలి కానీ, అధికార పార్టీ నేతల, పారిశ్రామికవేత్తల విషయంలో ఒకలా, పేదల విషయంలో మరోలా వ్యవహరించడం సరైంది కాదన్నారు. ఇది ప్రజాస్వామ్యానికి విరుద్ధమని ఆయన పేర్కొన్నారు.
బీజేపీ పోరాటం ఆగదు
న్యాయం జరిగే వరకు బీజేపీ ఈ విషయంలో పోరాటం చేస్తుందని బండి సంజయ్ కుమార్ స్పష్టం చేశారు. పేదలకు అండగా ఉంటామని, అక్రమాలకు పాల్పడిన వారిపై చర్యలు తీసుకునేలా ప్రభుత్వాన్ని ఒత్తిడి చేస్తామని ఆయన తెలిపారు.