కేరళ మాజీ సీఎం వి ఎస్ అచ్యుతనందన్ కు ఘన నివాళి

-సిపిఐ (ఎం) మండల నాయకులు కొండ ఉప్పలయ్య

నమస్తే భారత్ :-మరిపెడ

కేరళ మాజీ సీఎం విఎస్ అచ్యుతనందన్ సేవలు మరవలేవని ఆయన బడుగు జీవులకు అండగా నిలిచి పోరాడిన యోధుడని సిపిఐ(ఎం) మండల నాయకులు కొండ ఉప్పలయ్య అన్నారు. శుక్రవారం మండలంలోని అబ్బాయి పాలెం గ్రామంలో సిపిఐ( ఎం) గ్రామ శాఖ ఆధ్వర్యంలో వి ఎస్ అచ్యుత నందన్ చిత్రపటానికి ఘన నివాళి అర్పించి సంతాపం తెలిపారు. ఈ సందర్భంగా ఉప్పలయ్య మాట్లాడుతూ అచ్యుతనందన్ అంటే కేవలం ఒక రాజకీయ నేతనే కాదు, ముఖ్యమంత్రిగా, ప్రతిపక్ష నేతగా, పార్టీ రాష్ట్ర కార్యదర్శిగా, తుది కంట ప్రజాసేవలో అంకితమైన మహనీయుడని ఉప్పలయ్య కొనియాడారు. 150 కిలోమీటర్లు 22 గంటల వరకు ఆయన అంతిమయాత్ర తిరువనంతపురం నుండి పరావూరుకు మధ్య
కొనసాగిందని బహుశా ఇన్ని గంటలు అంతిమయాత్ర జరిగిన నాయకుడు ఎవరూ లేరని ఆయన గుర్తు చేశారు. ఆయన మరణ వార్త తెలిసిన బడుగు జీవుల ప్రజలు అంతిమయాత్ర వెంట ఉంటూ కడసారి వీడ్కోలు పలికారని వివరించారు. భారతదేశంలోని కేరళ రాష్ట్రం అభివృద్ధి పథంలో నడవడానికి ఆయన కృషి చేశారని పేర్కొన్నారు. అక్షరాస్యతలో 98% అభివృద్ధి సాధించారంటే పేదలపై ఆ ప్రభుత్వంకు విశ్వాసం కలిగి ఉందన్నారు. అంతేగాక రాష్ట్రంలో అన్ని దేవాలయాలకు దళితులనే పూజారులుగా నియమించారని, ఆర్ఎస్ఎస్ లాంటి మత సంస్థలను బ్యాన్ చేశారని, ఈ పని ఇతర ఏ రాజకీయ పార్టీలు చేసే దమ్ము వారికి లేదన్నారు.  అలాంటి మహనీయుల అడుగుజాడల్లో కార్మిక వర్గం, నాయకులు ప్రజలు నడవాలని ఆయన కోరారు. మానవాళికి కావలసిన హక్కులన్నీ పొందాలంటే ఎర్రజెండా నాయకత్వంలో జరిగే ప్రజా ఉద్యమాలే వేగుచుక్కలన్నారు . ఈ కార్యక్రమంలో  మండల నాయకులు జిన్న లచ్చయ్య, సిఐటియు జిల్లా సహాయ కార్యదర్శి దుండి వీరన్న, సీనియర్ నాయకులు ఎర్ర వెంకన్న, కామెండ్ల వెంకన్న, కార్మికులు మహిళలు తదితరులు పాల్గొన్నారు.