అమరావతిలో వనమహోత్సవం.. మొక్కలు నాటిన చంద్రబాబు, పవన్ కళ్యాణ్

ప్రపంచ పర్యావరణ దినోత్సవం సందర్భంగా ఆంధ్రప్రదేశ్‌ రాజధాని అమరావతిలో వనమహోత్సవం కార్యక్రమం నిర్వహించారు. ఈ కార్యక్రమంలో ముఖ్యమంత్రి చంద్రబాబు నాయుడు, డిప్యూటీ సీఎం పవన్ కళ్యాణ్ పాల్గొన్నారు. అమరావతి రాజధాని ప్రాంతం అనంతవరంలోని ఏడీసీఎల్ పార్క్‌లో మొక్కలు నాటారు. అనంతరం వన మహోత్సవ సభలో ప్రజలను ఉద్దేశించి ప్రసంగించారు. పర్యావరణ పరిరక్షణలో ఏపీ దేశానికే ఆదర్శం కావాలని సీఎం చంద్రబాబు అన్నారు. చెత్త నుంచి కూడా సంపద సృష్టించే మార్గాలున్నాయని.. చెత్త నుంచి విద్యుత్ ఉత్పత్తి చేసే ప్రయత్నాలు చేస్తున్నామని పేర్కొన్నారు. గతంలో ఒక ప్రభుత్వం ఉండేదని.. ఆ ప్రభుత్వానికి చెట్లు నరకటం బాగా తెలుసు కానీ మొక్కలు నాటడం, పెంచటం తెలియదని వైసీపీపై పరోక్ష విమర్శలు గుప్పించారు. ఈ సందర్భంగా ఈ రాఖీ పండగకు.. సీడ్ రాఖీలు ఉపయోగించాలని ఆడబిడ్డలకు పిలుపునిచ్చారు. ఈ సీడ్ రాఖీ ద్వారా పర్యాపరణ పరిరక్షణకు పాటుపడాలని సూచించారు. సోదరుల జన్మ నక్షత్రానికి తగిన చెట్టు విత్తనాలతో రూపొందించిన సీడ్ రాఖీని కట్టాలని పేర్కొన్నారు. ఇక డిప్యూటీ సీఎం పవన్ కళ్యాణ్ మాట్లాడుతూ.. చెట్టు మనకు ఆధారమని.. చెట్లు లేని భూమిని ఊహించలేమని తెలిపారు. నల్లమల అటవీ పరిరక్షణ కోసం 3 దశాబ్దాలుగా అలుపెరగకుండా పని చేస్తున్న కొమ్మిర అంకారావు జీవితం భావితరాలకు స్ఫూర్తివంతమని వెల్లడించారు.