శంషాబాద్: రాజీవ్ గాంధీ అంతర్జాతీయ విమానాశ్రయం (RGIA)లో పోగొట్టుకున్న బంగారు గొలుసును పోలీసులు అతి తక్కువ సమయంలోనే గుర్తించి బాధితురాలికి అందజేశారు. ఎస్‌హెచ్‌ఓ ఎస్. కనకయ్య నేతృత్వంలోని పోలీస్ బృందం ఈ ఆపరేషన్‌ను విజయవంతంగా పూర్తి చేసింది.
వివరాల్లోకి వెళ్తే...
విమానాశ్రయ డిపార్చర్ (Departure) ప్రాంతంలో తన 5 గ్రాముల బంగారు గొలుసు పోయిందని బాధితురాలు డి. శిరీష ఆర్‌జీఐఏ పోలీస్ అవుట్‌పోస్ట్‌లో ఫిర్యాదు చేశారు. బాధితురాలి ఫిర్యాదుపై ఎస్‌హెచ్‌ఓ ఎస్. కనకయ్య తక్షణమే స్పందించి కేసు నమోదు చేయడమే కాకుండా, ప్రత్యేక బృందాన్ని రంగంలోకి దించారు. విమానాశ్రయంలోని సీసీటీవీ (CCTV) దృశ్యాలను క్షుణ్ణంగా పరిశీలించిన పోలీసులు, గొలుసు ఎక్కడ పడిపోయిందో ఖచ్చితంగా గుర్తించి దానిని స్వాధీనం చేసుకున్నారు.
అనంతరం ఆ బంగారు గొలుసును బాధితురాలు శిరీషకు అప్పగించారు. ఆ గొలుసు తన భర్త ఇచ్చిన బహుమతి కావడంతో, అది తిరిగి దొరకడంపై ఆమె ఎంతో సంతోషం వ్యక్తం చేశారు. ఫిర్యాదు చేసిన వెంటనే స్పందించి గొలుసును అప్పగించిన ఎస్‌హెచ్‌ఓ ఎస్. కనకయ్య మరియు హైదరాబాద్ పోలీసుల పనితీరును ఆమె ఈ సందర్భంగా ప్రత్యేకంగా ప్రశంసించారు. ప్రయాణికుల భద్రత, వారి వస్తువుల రక్షణే తమ మొదటి ప్రాధాన్యతని ఎస్‌హెచ్‌ఓ పేర్కొన్నారు.