అక్రమ నిర్మాణాల పై   వివక్షత ఎందుకు?

కొన్నిటిని కూల్చి మరికొన్నిటిని వదిలి వేయడం దారుణం 

శంషాబాద్ పురపాలిక లో వింత ధోరణి 

 నమస్తే భరత్, రాజేంద్రనగర్, జులై 17. పురపాలక పరిధిలో ఎలాంటి అనుమతులు లేకుండా నిబంధనలకు విరుద్ధంగా పుట్టగొడుగుల్లా నిర్మాణాలు చేపడుతుంటే అధికారులు మాత్రం చోద్యం చూస్తున్నారు. స్థానికుల ఫిర్యాదులు అందితే కొన్ని సందర్బల్లో మాత్రమే ఆగ మేఘాల మీద వెళ్లి అధికారులు ఏదో కొద్దిగా కూల్చి చేతులు దులుపుకొని తిరిగి వచ్చేస్తున్నారు. పురపాలక, మండల పరిధిలో జరిగే పరిస్థితి ఇది, పురపాలక, మండల పరిధిలో లెక్కకు మించి అనుమతులు లేకుండా నిబంధనలు తుంగలో తొక్కి పెద్ద ఎత్తున నిర్మాణాలు చేపడుతున్నా అటువైపు అధికారులు కన్నెత్తి చూడకపోవడం విడ్డూరం, కొన్ని సందర్భాల్లో అధికారులు వచ్చి అక్రమ నిర్మాణాలు అంటూ కొద్దిపాటి చర్యలు చేపట్టి తిరిగి వెళ్ళిపోతున్నారు. పురపాలక పరిధిలో నిత్య కృత్యంగా సాగుతున్న సంఘటనలు, నిబంధనలకు విరుద్ధంగా నిర్మాణాలు చేసే వాటిపై చర్యలు చేపట్టాల్సి ఉన్న పట్టించుకోకపోవడంపై స్థానికులు ఇతర నాయకులు ఫిర్యాదులు చేస్తున్నప్పటికీ అధికారులు మాత్రం స్పందించకపోవడం పరిపాటిగా మారింది. పురపాలక పరిధిలో ఇటీవల ఇరవై రోజుల క్రితం జాతీయ రహదారి పక్కన రెయిన్ బో హోటల్ పక్కన ఓ నిర్మాణదారుడు ఐదు ఫ్లోర్లు  నిర్మాణాన్ని చేపడుతుండగా అధికారులు ఫిర్యాదులు అందాయని చెప్పి అక్రమ నిర్మాణం అని పురపాలక సిబ్బంది ఒకరోజు మొత్తం కూడా కిటికీలు దర్వాజలు కూల్చి వేశారు. అదేవిధంగా రాయల్ విల్లాస్, మధురానగర్ తదితర ప్రాంతాల్లో విచ్చలవిడిగా ఎలాంటి అనుమతులు లేకపోయినా, జీవో 111 నిబంధనలు తుంగలో తొక్కి నిర్మాణాలు చేపడుతూ ఉంటే అధికారులు కన్నెత్తి కూడా చూడకపోవడం విస్మయానికి గురిచేస్తుంది. రాయల్ విల్లాస్ లో మధురానగర్ తదితర ప్రాంతాల్లో పెద్ద ఎత్తున బహుళ అంతస్తుల నిర్మాణాలు నిరాటంకంగా కొనసాగుతుంటే అధికారులు ఎందుకు చర్యలు చేపట్టడం లేదని స్థానికులు ఆరోపిస్తున్నారు. రాయల్ విల్లాస్ లో పెద్ద భవనాలు నిర్మాణాలు నిత్యకృతంగా కొనసాగుతుండడం  అధికారులు అటు వైవు కన్నెత్తి చూడకపోవడం విస్మయానికి గురిచేస్తుంది. ఇప్పటికైనా అధికారులు  అక్రమ నిర్మాణాలు, నిబంధనలు విస్మరిస్తున్న నిర్మాణాల పై దృష్టి సారించి వెంటనే చర్యలు చేపట్టాలని కోరుతున్నారు.